குவலய  விருதைப் பெற்றேன்

தூயவன்

கனடா உலக விருதை

 கனிவாய் உவந்தே தந்தார்

மனதில் மாசில் லோகன்

      மகிழ்வின் அன்புப் பெருக்கு

கனவா நனவா என்றே

கருதும் டொரண்டோ நகரில்

குணத்தோர் இணைந்தே தந்த

குவலய  விருதைப் பெற்றேன்  

 

மலரை எனக்கே சூட்டி

 மன்றம் ஊர்தி அழைத்து

தளரா நட்பின் நாதம்

 திரண்ட மக்கள் அரங்கில்

பலரும் வியந்தே அழைக்க

பருவத் தமிழாம் கன்னி

பலகனி தொங்கும் தோப்பாய்

     பாவை மனமாய் நின்றேன் 

 

உலகத் தமிழின் எழுச்சி

உவந்தே அரங்கம் கண்டேன்

 பல்கலை வித்தகர் காட்சி

பருவ இதழ்கள் மாட்சி

 தலைவர் அமைச்சர் சூழ்ந்தே

தக்க அரசியல் சான்றோர்

 கலைவுயர் கனடா மண்ணில்

 கவினார் விருதைத் தந்தார்

 

 உணவுத் திருவிழா போன்றே

 உவந்தே உணவுகள் வழங்கி

கனிவாய் இசையின் ஆட்சி

கருதும் அறிஞர் எல்லாம்

இனிமை இயைந்தே மன்றம்

இயல்பாய் மக்கள் வெள்ளம்

வினையின் உதயன் மாட்சி

விருதின் பெருமை அன்றோ

 

{கனடாவில் டொரண்டோ நகரில் 26 -5-2024 அன்று உதயன் உலக விருது 2024 பெற்றபோது தமிழ்மாமணி வா.மு.சே.திருவள்ளுவர் எழுதியது}